22 студзеня 2019 г. ускладаннем кветак да помніка Тараса Шаўчэнкі супрацоўнікамі Пасольства Украіны і кіраўнікамі арганізацый украінскай дыяспары Беларусі, пачаліся мерапрыемствы па святкаванню 100-годдзя Саборнасці Украіны ў Мінску.

Урачыстасці працягваліся на працягу дня і завяршыліся прыёмам у Пасольстве Украіны пры ўдзеле прадстаўнікоў украінскай дыяспары Беларусі, мясцовых грамадскіх арганізацый, украінскіх і беларускіх СМІ. Перад прысутнымі выступілі Пасол Украіны ў Рэспубліцы Беларусь Ігар Кізім, кіраўнікі дыяспарных арганізацый, а таксама вядомы беларускі гісторык Віктар Кахновіч. Госці Пасольства мелі таксама магчымасць паглядзець дакументальную кінастужку, прысвечаную гэтай гістарычнай падзеі, азнаёміцца з кніжнай выстаўкай, падрыхтаванай да стагоддзя Саборнасці Украіны, і пачуць украінскія народныя песні ў выкананні хору «Крыніца».

Звяртаючыся да прысутных, І.Кізім, у прыватнасці, адзначыў важнасць вывучэння ўрокаў падзей стогадовай даўнасці ў кантэксце барацьбы за незалежнасць і забеспячэння тэрытарыяльнай цэласнасці Украіны, неабходнасці яднання ўсіх дэмакратычных сілаў дзеля росквіту адзінай, саборнай, незалежнай Украіны.

Падчас мерапрыемства таксама адбылося ўрачыстае ўручэнне пасведчанняў замежных ўкраінцаў прадстаўнікам украінскай абшчыны Беларусі.